Bitaraplyk parahatçylykdyr.
Kalbynda bir-birege, tutuş dünýä halklaryna ýagşy arzuw-niýetler,
dost-doganlyk gatnaşyklary duran Türkmenistan döwletimiziň Bitaraplyk
syýasatynyň ynsanperwerligiň, hoşniýetliligiň älem içre jar bolmasydyr.
Diýarymyzyň sebitde asudalygynyň üpjün edilmegine mynasyp goşant goşýan ýurt
hökmünde alyp barýan umumadamzat bähbitli syýasatynyň kepilidir. Hormatly
Prezidentimiziň belleýşi ýaly, Bitaraplyk türkmen halkynyň, dünýä bileleşiginiň
ynsanperwer maksatlaryny rowaçlandyrýar. Döwletleriň we halklaryň arasynda
parahatçylygy hem-de hoşniýetli gatnaşyklary pugtalandyrýar.
Baýramçylyk mynasybetli Türkmenistanyň Medeniýet ministrliginiň Demokratik Partiýasynyň ilkinji
guramasy tarapyndan Türkmenistanyň Şekillendiriş sungaty muzeýinde «Hemişelik Bitarap
Türkmenistan parahatçylygyň we ynanyşmagyň ýurdy» atly wagyz-nesihat duşuşygy geçirildi. Duşuşykda
Medeniýet ministrliginiň döredijilik işgärleri bölüminiň hünärmeni Ogulgurban
Gaşlakowa, Türkmenistanyň Demokratik Partiýasynyň Aşgabat şäher komitetiniň
Hasabat bölümçesiniň hasabatçysy Gülsoltan Şallyýewa dagylar çykyş etdiler.
Olar öz çykyşlarynyň dowamynda türkmen halkynyň Milli
Lideri Gahryman Arkadagymyzyň, Arkadagly Gahryman Serdarymyzyň Garaşsyz we hemişelik Bitarap Türkmenistan döwletimiziň
parahatlygy, howpsuzlygy we durnukly ösüşi ugrunda alyp barýan işleri üçin köp
sagbolsun aýtdylar.
